Electric Blue... it's love!

I was born to love you

noreply@blogger.com (Electric Blue) — Wed, 23 Dec 2009 20:10:00 +0000

Das passt doch zum "Fest der Liebe"
Und wer cha das besser überebringe als de Freddie... nach wie vor en echte Verluscht!

no öppis

noreply@blogger.com (Electric Blue) — Wed, 23 Dec 2009 15:59:00 +0000

wasi no ha welle säge... lueged dänn dass nume d'Cherzli oder d'Herzli brenned...

händ e schöni Ziit
mit allem was eu guet tuet

de cheibe Huushalt

noreply@blogger.com (Electric Blue) — Tue, 22 Dec 2009 15:46:00 +0000

Da stiegt mer, nichts ahnend und mit Elan, vom Stuehl abe und dänn so öppis...

souverän glandet, Chnü vertrülled und d'Stöck sind mini neue und vorläufige Begleiter da Jahr. Was es isch weiss niemerds, Chnöche sind immerhin no heil - zum Glück. Nachere schlaflose Nacht, hoffi dass es hüt mit Medis besser gaht. Susch gangi eifach nöd is Bett, isch en Horror gsi. De Bewegigs-Radius hät en halbe Milimeter usgmacht und susch bini sofort gstraft worde. Gstraft bini au, will mini Rennmuus i de Garage bliebt bis uf weiteres... nüt bliebt eim erspart, gopf!

Oh du fröhliche...

PS: D'Vorgschicht isch die: han welle d'Neonröhre i de Chuchi uswechsle. Zerscht isch die cheibe Abdeckig nöd obeabe cho. Nach längerem hin und her, hät das aber funktioniert, die neu Röhre isch a ihre Platz cho. D'Abdeckig wieder ufe... die link Schruube isch scho dobe gsi, chunnt die recht Siite obenabe. Und willi die han welle abfange, bini echli rassig vom Stuehl abe... Feierabend. S'Superblondie isch "out of order" gsi - nullkommaplötzlich...

was bliebt

noreply@blogger.com (Electric Blue) — Wed, 16 Dec 2009 11:38:00 +0000

Gaht nüme so lang wie's scho duured hät. Wie de Blitz isch das Jahr ume gsi. De viert Advent isch so nöch wie nie, d'Wiehnacht und s'Neujahr in Griifwiiti. Gege jedi Ueberzügig hani mir doch es paar Sache vorgno. Verschreis aber nöd da, susch wirdi dra ufghänkt, wänn's i'd Hose gaht... ;-)

Eis sägi aber doch, han mir vorgno viel meh Ziit mit Lüüt z'verbringe wo mir guet tüend, als mit dene wo mich no zuesätzlich is Loch aberissed. Und es hät vo dene es paar gha da Jahr. Aber nichts desto trotz bini zueversichtlich, dass no es paar Türli ufgönd und s'neu Jahr nöd ganz so belaschtet isch, wie s'alt gsi isch.

In diesem Sinne wünschi allne e tolli, stressfreii Rescht-Adventsziit, es paar schöni Stund mit Lüüt wo EU guet tüend. Bliebed gsund und rutsched guet und mit viel Karacho is 10i!

3. Advent

noreply@blogger.com (Electric Blue) — Mon, 14 Dec 2009 18:51:00 +0000

Und scho isch de 3. Advent ume, mit iidrückliche Erlebnis. Aagfange häts scho am Friitig. Det bini a mini erscht Huusfraue-Wiehnacht gange. Nacheme turbulente Mahl im Tres Amigos simmer gschlosse a'd ü40-Party. Nöd sooo speziell gsi, ussert dass mer nach Mitternacht no d'Magnum Fläsche gunne händ, resp. eini vo eus. Da bini allerdings grad uf de Heiweg gange. Vo luuter Ruggeweh hani mich chuum no chönne bewege. Han mich somit uf mis Bett gfreut.

Am Samschtig bini zerscht zu mim Kumpel uf Höri gange. Det hani en Kafi übercho und han mis Schmuckstück dörfe under s'Dach stelle. Mer sind nämli mit em "Koloss" (säg dem immer so) Richtig Bern gfahre, um eusi obligatorisch Mini-Wiehnacht abz'halte. Mega romantisch hämmer dörfe im Schloss Laupe, Laufe oder was au immer en total gediegne Abig mitenand verbringe. Echli trüebt hät das ganze mini doofe Malheure... zerscht zerschmetteri ich mis Handy i de Türe vom Koloss und im Schloss hät min Foti nüme welle, wie ich ha welle... echt... gopf uf nüt isch meh Verlass. Han mich gnervt wie selte. Woni am Morge am 3 heicho bin, hani drum zerscht müesse mis Reserve-Handy uf en aanehmbare Level bringe und de Foti wieder zu neuem Lebe erwecke. Isch mir beides glunge - zu vorgerückter Stunde... gääääääääääähn
Gschlafe hani am Sunntig bis fascht am 12i, häts scho Jahre nüme ge, ha's fascht nöd chönne glaube.
Echli verwöhnt fäng, langed mir s'Reserve-Handy knapp. De Entscheid, mis Palm endli i'd Flicki z'bringe isch endli gfalle. So gaht's ja nöd...

De Mäntig isch inzwüsched au fascht wieder ume und ich bin zum 2. Mal a de Twilight-Büecher am Lese. Cha fascht nüme ufhöre... S'erscht hani i 7 Stund g'lese ohni irgendöppis anders z'mache. Und so hani de Rescht verschliesse. Mit Augering bis a'd Chnü abe, am nöchschte Tag go schaffe... yeah!

englisch lehre down under

noreply@blogger.com (Electric Blue) — Mon, 07 Dec 2009 13:36:00 +0000

... leb din Traum in Australie! Das isch s'Motto vo de Firma vo mim Cousin und sinere Frau. Lueged doch mal ine und wer weiss... ev. packts ja de eint oder ander ;-)

Englisch lernen down under

by the way, selbschtverständli au im facebook z'finde...

englisch lernen - down under - lebe deinen Traum

the day before friday

noreply@blogger.com (Electric Blue) — Thu, 03 Dec 2009 13:32:00 +0000

Isch zwar nüme Morge, wünsch eu das aber trotzdem no... e alti Frau isch ja schliessli kän D-Zug!

Grüenzüg

noreply@blogger.com (Electric Blue) — Thu, 03 Dec 2009 11:42:00 +0000

Ich lieb Natur und alles was dezueghört - solangs verusse bliebt. Dine verreckt mer nämli regelmässig alles und han drum eigentli beschlosse nüt meh söttigs i mini Wohnig z'stelle. Und dänn chunnts ja amigs andersch als mer denkt. Scho am erschte Tag i minere Wohnig bini "stolzi" Bsitzerin vo so grüenem Gstrüpp worde. Altlaschte vo minere Vorgängerin, womer nöd hät chönne zügle. Ok hani mir gseit, ob's jetzt bim Zügle gstorbe wird oder in Etappe vo mir, spielt ja im Endeffekt kä Rolle. Tot isch irgendwänn eifach tot, oder? Trotzdem hät mich aber das Ding derart gnervt, dass ich de Prozess beschlüniged han. Brotmesser zückt und harakiri gmacht... r.i.p.. Will ich mich aber inzwüsched echli dra gwöhnt han, dass da öppis staht, isch de Ersatz gli organisiert gsi. Mal luege wie lang das lebt... nachane chunnt nome no Plastik ine - basta!

Isch min Ficus-Monschter-Bonsai nöd schick? Aber am herzigschte sind doch mini küssende Wichtel vorane dra... Defür muessi jetzt die fehlende Vorhäng glich no ufhänge, wills susch so leer usgseht det. Äch hani mir wieder öppis ufglade...

xmas bim Hundertwasser

noreply@blogger.com (Electric Blue) — Sat, 21 Nov 2009 09:24:00 +0000

De Adventsusflug staht vor de Tür. Für eimal, resp. zur Abwechslig gömmer mal e Wuche früehner a'd Hundertwasser-Wiehnachts-Usstellig. Föteli und de obligati Senf dezue folged...

http://www.markthalle-altenrhein.ch/events.html

immer wieder spannend am Hundertwasser sini Gebäude

Cherzli sind immer schön, aber i de Winterziit unabdingbar

die Wand mit de Fläsche isch eifach nume genial

Gschirr in "electric blue", gopf wieso bini immer so schnell ;-)

Isch en super schöne Mittag, aneme mega spezielle Ort gsi, mit Kumpels woni immer wieder gern um mich ume han. S'Ziel, d'Iistimmig uf die Wiehnachtsziit, hät voll funktioniert...

mer gönnt sich ja susch nüt

noreply@blogger.com (Electric Blue) — Sat, 14 Nov 2009 10:17:00 +0000

Eigentli hani nume Moscht brucht, woni a'd Tankstell bini und dänn das... mini Lieblings-Mohrechöpf!
Wer die eimal ganz früsch gesse hät, isst kei anderi meh. Die begleitet mich scho mis ganze Lebe. Nume händs mal weniger als d'Hälfti koschtet, de Rescht isch bliebe.
Han beschlosse, das git no es Blueschtfährtli det ane.

http://www.mohrenkopf.com/standort.htm

Wer die no nie probiert hät, hät öppis verpasst,

und so werdeds gmacht...

Jahrmärt

noreply@blogger.com (Electric Blue) — Thu, 12 Nov 2009 11:48:00 +0000

schön isch er gsi und scho wieder verbi...

Wetter isch traumhaft mild gsi und perfekt für de Aalass.
So mittzt drin hätt öppis, bruchsch käs Auto, dörfsch (fascht) alles. Dementsprechend bini hüt echli knülle. Eh ja, ha ja jetzt wieder es Jahr Ziit zum mich z'erhole ;-)

happy

noreply@blogger.com (Electric Blue) — Sun, 08 Nov 2009 07:24:00 +0000

Sunday morning... Gipfeli und SoBli sind organisiert, de LatteM staht im Tassli vor mir. Dank facebook chunnt min Blog eidütig echli z'churz. Shame on me - ich weiss. Drum mal wieder öppis us minere Richtig.

Mis neue Lebe isch jetzt scho über 2 Monät alt und immerno ungewohnt und gwöhnigsbedürftig. Mini chli Wellness-Oase wird aber immer gmüetlicher und s'Heicho macht täglich meh Freud. Min Schlaf chunnt langsam wieder zrugg und somit au mini Erholig. Immerno fehlt mis Prunkstuck, mini Jukebox. Hoff ich schaff das no da Jahr - isch ja nüme so lang.

Bim Schaffe hani im Moment ziemli z'tue. Bin fascht de ganz Tag det. Zum Glück, muess ja no für s'2009 die ganze Stüüre allei zahle - Grati adieu! Nöchscht Wuche isch au suscht no ziemli gäch, hämmer doch eusen Jahrmärt am Mittwuch. De Termin für alli Wiiländer. Und ich s'erscht Mal mittzt drin und s'erscht Mal ohni Auto uf de Pischte. Yeah de eint oder ander Schlummi isch somit genehmigt und absolut erwünscht. Am Friitig de 13. wär eigentli Höck... eigentli will ander Termine aastönd. Usgrechnet, jetzt wo endli s'Album vo Silverstone da isch. Gopf! Aber für öppis hätt mer ja so tolli Kumpels, wo eim das Züg no naschleicked. Slappy spendier glatt en Kafi ;-)

Ja wie gseht min Sunntig us? Zerscht wird die neu Lektüre zensuriert, Gipfeli schnabuliert und min LatteM vernichtet. Dänn hani andersch z'tue. Han mir Arbeit heigno, die wo nöd am PC stattfindt, um d'Lawine nöchscht Wuche ufem Minimum z'halte. Dänn warted min panicroom uf wiiteri Bearbeitig, wobi uf das hani absolut kä Bock. Echli chille muess si, schliesslich muessi morn bi de Sach si.

Somit wünschi allne en tolle Sunntig mitere chline musikalische Inspiration. Bi dem Lied stönd mir regelmässig d'Nackehaar z'Berg... isch mit nütem z'tope. Hoff eu gfallts au.

happy / Leona Lewis

alti Bekannti

noreply@blogger.com (Electric Blue) — Wed, 28 Oct 2009 18:38:00 +0000

Nachdem de Beni um s'Verrecke nöd hät welle aalüüte, hani wenigschtens alti Bekannte entdeckt. Bim Medley vo de Niederdorfopere im Benissimo hät doch tatsächlich en ehemalige Arbetskolleg mitgspielt. Hätter guet gmacht. Au de Vock isch en würdige Ersatz für de Ruedi Walter... Ha die Ufführig no nie am Stuck gseh, isch ev. mal Ziit...

Benissimo vom 24.10.2009

http://www.kleine-niederdorfoper.ch/
http://www.lukas-schoenenberger.ch/

Nostalgie...

noreply@blogger.com (Electric Blue) — Sat, 24 Oct 2009 10:22:00 +0000

... grad vor de Tür! De Bentley & Rolls Royce Club isch uf de Gass und bi eus i de Kafi-Pause. Herrlich was da alles umestaht...

wunderschööööön

D'Umgebig isch nöd grad so würdig für die tolle Oldies. Aber schön sind's verbi cho.

Relax-Insle

noreply@blogger.com (Electric Blue) — Thu, 15 Oct 2009 17:21:00 +0000

... i de Wellness-Oase glandet...

S'Warte hät sich würkli glohnt, oder?

bunt gemischt, wie de Herbscht

noreply@blogger.com (Electric Blue) — Wed, 14 Oct 2009 10:41:00 +0000

Jetzt isch scho über en Monät ume, sit ich es neus Kapitel i mim Lebe aagfange han. Han immerno ziemli Müeh, mich z'recht z'finde. Isch e mega Umstellig. Freu mich aber über mis herzig Domizil, wo immer gmüetlicher wird. D'Baustell vor de Tür isch zwar nöd so hitig, aber einigermasse usz'halte.

Mini Kumpeline hät mir zur Ueberbrückig ihri Sofaliege überla. Die isch no kän Tag da gsi, händs mir scho mis Sofa avisiert. Morn isch es sowiit... wird mich am erschte Weekend nume no zum Bis... obenabe bewege. Herrlich!

Vorem erschte Schnee nomal uf d'Alp Scheidegg isch z'Ziel gsi. Das hämmer glaub meh wie knapp gschafft. Isch en mega schöne Sunntig mit mega lässe Lüüt gsi. D'Ablenkig isch meh als willkomme gsi. Inzwisched fallt d'Schnellfallgrenze stündlich und nöchschte Sunntig gsehts viellicht scho nüme so rosig us.

S'Zwergdaggeli vom Mami isch am Mäntig s'erscht mal uf Bsuech cho. Uf de erschte Entdeckigsreis dur mis neue Riich, hät sie mis Elefäntli entdeckt, woni scho über 25 Jahr hüete. Nöd schüüch schnappt sie das riese Ding und schürgts mit einere Euphorie dur die ganz Hütte. S'End vo de Gschicht isch schnell verzellt. Das Ding isch pflotschnass gsi und hät gröber gmüfflet. Zum erschte Mal i 25 Jahr hät halt mis Elefäntli i'd Wösch müesse und aaschlüssend no in Tumbler. Yeah, gseht us wie früsch zum Lade us. Hoffentli au, isch sautüür gsi und söll absolut chinderfründlich si. Voila!

Endli, geschter hät mini Chli öpper zum Spiele übercho... Min Kumpel hät es Bsüechli gmacht und mer händ en mega friedliche Mittag gha. Hüt isch de Zauber scho wieder verbi. De arm Hagel hockt mit akuter Blinddarmentzündig im Spital und muess bis fascht am Friitig detbliebe.

Wünsch dir ganz gueti Besserig! D'Manu söll dir ganz guet luege gell!

gar nöd wüescht...

noreply@blogger.com (Electric Blue) — Wed, 07 Oct 2009 14:07:00 +0000

... mis neue Umfeld. Bi dem Traumwetter fascht es Gedicht...

Schloss Andelfinge, jede Bsuech wert, hät en liebevoll pflegte Garte mit Park

super-spezielli Topf-Pflanze

scho de Weg in Park isch genial

mega romantisch

de chli Pavillon chammer miete, Platz häts für ganz intimi Parties ;-)

währschafti Bäum, herrlich

was das isch weissi nöd, gseht doch aber so richtig freaky us oder?

da isch mini Kumpeline dehei, d'Hüser gsehnd i eusere Region no viel so us, so richtig urchig

Dorfplatz mit Blick uf d'Chile

fascht scho wieder dehei stönd doch da Galoppeli, herzig

so da simmer wieder, mis Schmuckstück staht brav vor sim Stall und warted uf mich... yeah

Prüfung gestern - Fahren heute

noreply@blogger.com (Electric Blue) — Mon, 05 Oct 2009 18:33:00 +0000

Wie wärs miteme update im eigete Fahrverhalte? Meh Sicherheit uf de Strass cha nöd schade und Lebe rette au nöd... usserdem machts Spass! Gern fahre und guet fahre isch nöd s'glich. Zweiteres muess unbedingt immer wieder mal g'üebt und vertüüft werde. Wenn's ernscht wird hät mer nume ein Aalauf und de muess sitze... gönned eune Mitstriiter uf de Strass no es paar lebigi Moment...

http://www.stadt-zuerich.ch/content/pd/de/index/stadtpolizei_zuerich/praevention/verkehrsunfallpraevention/archiv/pruefung_gestern-fahrenheute.html

Truubeziit

noreply@blogger.com (Electric Blue) — Mon, 05 Oct 2009 18:19:00 +0000

Scho isch es Oktober und d'Wümmete isch i vollem Gang. Das super Herbschtwetter treit zuneme genial Wii bi. Regelmässig werded über 100 Oechsli gmesse. Git ja au en Huufe Arbet, dänn dörfs au en rechte Wii ge. Lömmer eus überrasche.

Sit Wuche Sunne heisst sit Wuche kä Niederschläg. Wird höchschti Ziit, isch alles furztroche und Waldbränd usw. drohed. Die 3 Tröpfli wo hüt cho sind langed bi wiitem nöd. Vo mir us dörfs au mal e Wuche duresträtze... D'Prognose gönd aber gar nöd i die Richtig - im Gegeteil. De wunderschöni Herbscht bliebt eus no es Wiili erhalte, sogar d'Temperature sölled nomal stiege. Zum Luege isch es ja traumhaft, das farbig Laub und de immerno tüüfblaui Himmel. Gnüssed mers solang mer chönd. Uf eimal liit en Meter Schnee vor de Tür...

mis Knuspermüsli wird no berüehmt...

noreply@blogger.com (Electric Blue) — Sat, 03 Oct 2009 16:56:00 +0000

Ja, ja so gaht's, mis Töchterli wanderet als Deko dur de Clip. Weiss gar nöd, wasi söll säge... Lied hät en gängige Rythmus i'd Latino Richtig. Aafangs Summer wär das fascht no besser gsi... Qualitativ findi de Clip guet abgmischt, mit dene 2 langbeinige Highlights käs Wunder ;-)

mit em Witz des Tages...

noreply@blogger.com (Electric Blue) — Sun, 27 Sep 2009 15:45:00 +0000

... wünschi eu e tolli, humorvolli Wuche!

Ein krimineller Osterhase springt aus einer Schneeverwehung und sagt zum Schneemann: Gib mir deine Karotte oder ich föhn dich...

PS: Aso de Oschterhas hät sich offesichtlich als 2. Schneema tarnt ;-)

History

noreply@blogger.com (Electric Blue) — Sat, 26 Sep 2009 16:26:00 +0000

So hät mal mis Hüsli im 1940 usgseh. 1935 häts de Volg kauft.
Erbaut isch ca. 1850 worde. Min Vermieter hät mir die Datei überla und ich ha sie bereits dezent restauriert. Mini Programm sind für das aber nöd so geeignet merki grad.
Trotzdem hät mich s'Fieber packt und ich wott no meh wüsse, was es mit dem Hüsli uf sich hät.
Muess säge, es isch total charmant renoviert worde mit viel know how. S'eint oder s'ander chönnt mer no mache, aber alles zu seiner Zeit. Usserdem stahts under Heimatschutz!

heute schon gelacht? nein?

noreply@blogger.com (Electric Blue) — Sat, 26 Sep 2009 16:16:00 +0000

... dann los ...

putzig, Lachträne sind doch eifach Gold wert, oder?
Glücklichi Chind sind au dur nüt z'ersetze...

news a de Lindy-Hop-Swing-Front...

noreply@blogger.com (Electric Blue) — Thu, 24 Sep 2009 18:37:00 +0000

Ach Tanze isch so befreiend... muess unbedingt wieder iistiege... Da es paar Müschterli vo mim Brüeder... Kondition isch ganz klar ume hä!

De Clip söll Werbig si für die Band "inside". Gfallt mir total. Muess glaub wieder mal the big city en Bsuech abstatte. Zum Föteli isch die Stadt eifach perfekt.

letscht Friitig

noreply@blogger.com (Electric Blue) — Sat, 19 Sep 2009 16:45:00 +0000

Woni am letschte Friitig-Morge han welle go schaffe, hani e Premiere gha. Zum erschte Mal i über 10 Jahr bini allei ufem Parkplatz gsi und vor verschlossene Türe gstande. Hallo? Versteckti Kamera? Nei, nei, de Informations-Fluss isch au bi eus kän Hit! Gli druf abe hät mer mich vo mim Elend befreit und endli schaffe la ;-)